Poesia in dialetto milanese sui migranti:
Lampedusa
Scappen di sò paes vestii de strasc
cent, mila, on esercit de disperaa
òmen, dònn, tanti cont on fioeu in brasc
perchè a cà soa hinn di perseguitaa
voeuren scappà da la famm e da la guerra
lassen tusscòss, genidor i cà e la terra.
Resten in ball settiman, tanti, mes
gh'hann de girà mezz mond per vegnì chì
hinn di persònn giamò mal in arnes
che di sò penn voeuren domà guarì
traversen el desert, camminen a pee,
ma de lor, nissun el voeur tornà indree.
Tanti òmen vegnen persin piccaa
frustaa, trattaa come tanti animai
i dònn 'me al sòlit vegnen violentaa
resten in silenzi per evità alter guai
poeu gh'hann de fà l'ultim viagg sul mar
in man a scafisti ch'hinn di macellar.
Vegnen imbarcaa a fòrza su carrett
in doe gh'hann de pagà tanti danee
pòden nanca fiadà gh'hann de stà quiett
perchè i a sbatten giò 'sti brutt faccendee
gh'hann minga de mangià, gh'hann nò de bev,
ma poeu tiren on sospir de solliev.
A l'è quand comincen a vedè on lumin
dòpo tutti chi or passaa in mar
el viagg se presta rivà a la fin
e speren ch'el destin el sia men amar
l'è on isola, a l'è l'Italia, che bell
fa nagòtt se t'hee perduu on fradell.
L'è 'na noeuva vita, l'è 'na speranza
lontan da la famm, da la carestia
gh'è anca sù di dònn in gravidanza,
su st'isola gh'è aiutt, 'n'infermeria
se sbatten ‘n acqua per prima rivà
l’Euròpa, l'Italia, 'na noeuva cà.
E mì chì disi e ne son ben persuas
a Lampedusa el Nòbel de la pas.
Grazie Renato Colombo
La presenteremo all'Oscar internazionale *No al bullismo, alla guerra, alla violenza su Donne e
Disabili...Si, alla salvaguardia ambientale. Organizzato da acraccademia.it !
A cura di Crv-Centro Ricerche VALASSINESI-CRV e
acraccademia.it
😌😴
Nessun commento:
Posta un commento